Reidar Almås er professor og nestor innan norsk landbruksforsking. I denne boka gir Almås ei lettfatteleg innføring i den norske landbruksmodellen, med tollvern, marknadsregulering i regi av samvirke, jordbruksavtale, landbrukslover og utjamning mellom små og store bruk over heile landet. Almås har lenge vore ein varm forsvarar av den norske landbruksmodellen, men nyleg endra han syn. Norsk landbrukspolitikk, slik vi kjenner den, er ikkje til å berge. Vi treng noko nytt. Vi treng ein omstart, ein omstart verken dagens regime i landbruks- og matdepartementet eller dei norske landbruksorganisasjonane synest å vera i stand til å sette i gang.

Gras som veks på grasmyr, i lier, skog og fjell berre med hjelp av vatn, sollys og fotosyntesen er den sikraste grunnrenta i norsk landbruk som vi berre haustar halvparten av med dagens landbruksmodell. For å auke norsk matproduksjon på fornybare, lokale ressursar presenterer Almås ein alternativ landbrukspolitikk, der han foreslår radikalt nye verkemiddel som vil flytte på 2 av 14 milliardar av i overføringane. Med sine forslag og verkemiddel vil Almås få til eit sporskifte med tre store endringar:
1. Ein større del av den norske matproduksjonen skal baserast på norske ressursar.
2. Ein større del av foret til dei drøvtyggande husdyra skal koma frå utmark og kulturbeite, der dyra sjølve kan hauste fôret til låge kostnader.
3. Det må koma ei ny regional arbeidsdeling i norsk landbruk, der meir av kjøttproduksjonen blir kanalisert dit foret og spreieareala for husdyrgjødsel finst.

Denne boka vil vera ein brannfakkel i norsk landbrukspolitisk debatt. Den er eit forsøk på skape ein arena med ein høgare himmel over debatten om norsk matproduksjon, og samtidig eit varmt forsvar for eit allsidig, lønsamt og berekraftig landbruk for framtida.